Aramaixon euskeraz bizi gure dou!

Euskara ulertzen duten hiztunen arteko hizkuntza ohiturak aldatzeko ariketa soziala da Euskaraldia.

Helburu nagusia herritarren hizkuntza ohiturak aldatuta euskararen erabilera handitzea da.

2020an, azaroaren 20tik abenduaren 4ra egingo dugu ariketa eta aurten, norbanako bezala (ahobizi edo belarriprest izanez), parte hartzeko aukeraz gain, taldean parte hartzeko aukera ere izango dugu ariguneen bidez.

Aramaioko entitateak

Aramaion 20 entitatek eman dute izena.

Taberna, establezimenduak, elkarteak... bat egin dute Euskaraldiarekin eta konpromisoa hartu dute 20 egunetako epean euskaraz aritzeko, bai barrura begira egingo dituzten ekintzetan zein herrira begira, kanpora begira egingo dituztenetan.

Euskaraldiak irauten duen bitartean, irudi berezia ikusiko dugu guztietan, nolabait bereizteko eta herritarrok jakiteko horiek guztiek euskaraz lasai aritzeko guneak direla.

ARAMAIOKO ENTITATEAK IKUSI.

Belarriprest edo Ahobizi

Euskaraldiaren bigarren edizioan izena emateko epea zabaldu da. Aurreko edizioan moduan, ahobizi eta belarriprest rolekin parte hartuko dute azaroaren 20tik abenduaren 4ra egingo den ariketa sozialeko parte hartzaileek.

Euskaraldia hizkuntza ohiturak astintzeko ariketa soziala dela gogora ekarri dute antolatzaileek, euskararen erabilera bultzatzeko ariketa. Euskaraldiko partaideak beraien hizkuntza ohiturak aztertu eta aukeratzen duten rolaren arabera arituko dira 15 egunetan.

Aurreko edizioan bezala, bi rol izango dituzte aukeran izena ematen dutenek:

  • Belarriprest: Beraiei euskaraz hitz egiteko eskatzen dutenak dira belarriprest, euskara ulertzen dute eta beraiekin euskaraz aritzea nahi dute. Ulertzen duten guztiekin ez dute uneoro euskaraz hitz egingo agian, baina ahal eta nahi duten guztietan egingo dute. Gakoa jokaeran dago eta ez gaitasunean.
  • Ahobizi: Euskaraz ulertzen duten guztiekin euskaraz egingo dute ahobiziek. Euskaraz ulertzen ote duten ez dakienean lehen hitza, beti, euskaraz izango da; mintzakideak euskaraz ulertzen badu, euskaraz jarraituko dute beti. Gakoa ahal den guztietan euskaraz egitea da, jokaerak definitzen du rola, alegia.

Euskaraldian 16 urtetik gorakoek izena eman dezakete, helduen hizkuntza ohitura eta portaeretan eragitea baitu helburu ekimenak. Euskara ulertzeko gaitasuna gutxienez izan behar dute partaideek, baina hortik aurrera, bakoitzak erabakiko du zein rol den berarentzat egokiena. Modu kontziente eta borondatezkoan, hizkuntza ohiturak astindu edo euskararen erabileran aurrerapausoak eman nahi dituzten lagunek 15 egunetan bete nahi duten rola erabaki eta izena eman ahal izango dute, azaroaren 20tik abenduaren 4ra dagokien rolaren txapa jantzita ariketa egin ahal izateko.

Izena emateko: EMAN IZENA

Aramaioko egitaraua

Aramaion, Euskaraldiaren batzordean aztertzen ari gara proposamen ezberdinak. Herria girotu, euskarara ireki eta euskaraz elkartzea da asmoa. Nolabait ariketa soziala gurean ere egin dezagun, elkarrekin!

EGUNEAN BEHIN: "ARAMAIXON EUSKERAZ"

«Aramaixon euskeraz» izeneko taldea martxan da eta aukera duzu parte hartzeko. Bi epe zehaztu dira eta horietan jasoko den sailkapena hartuko da kontuan sariak banatzeko ere:

  • urriak 5 – azaroak 1
  • azaroak 2 – azaroak 29

Lehiaketa hau Euskaraldiaren barruan kokatzen eta sariak ere zerikusia izango dute Euskaraldiarekin. Hala nola aukera izango da Euskaraldiko lanpasak, amantalak irabazteko eta horrez gain, herriko gazta edota herriko jatetxe batean jatordua ere irabazteko aukera dago.

Animatu eta parte hartu!!!

Kontsultatu baldintzak:

Sare sozialak

Modernizatu egin gara!

Aramaioko Euskaraldiak aktibatu berri du Instagram kontua. Bertan jasoko dira Euskaraldiarekin lotutako argazki eta bideoak eta beraien bitartez zabalduko da informazioa, notiziak,… Protagonistak herritarrak izango dira, izan ere helburua denon artean kontua elikatzea da, euskaraz eta euskaratik!

Hauxe da helbidea:  https://www.instagram.com/aramaioeuskaraldia

Dagoeneko herritar askok onartu du jarraitzaile izateko gonbidapena!

Egon adi eta jarraitu zuk ere gure kanala!

Laster jakinaraziko ditugu sorpresa eta zozketa berriak!

Informazio praktikoa